UTATU MTAKATIFU WA MUNGU (Holy Trinity) 1

Bwana yesu asifiwe, nakusalimu katika jina la Yesu aliye Bwana na mwokozi wa maisha yetu.

 Karibu katika makala yetu hii ya AMKA UKUE KIROHO ambapo leo tuta jifunza somo linaloitwa, UTATU MTAKATIFU.

UTATU MTAKATIFU

Wakati huu sasa, Bwana ametupa neema nyingine ya kujifunza somo ambalo linamhusu Mungu wetu mmoja na wa pekee tena wa kweli, ambaye anazo nafsi tatu lakini yeye ni Mungu mmoja tu na wala siyo watatu.

Kati ya sifa nyingi na za kipee aliyo nazo Mungu wetu ni UTATU MTAKATIFU. Hakuna miungu wengine mahali kokote wa dini yeyote mwenye hii sifa. Utatu mtakatifu wa Mungu ni siri kuu sana iliyositirika inayoelezea utendaji kazi wa Mungu kwa undani sana.

Kimsingi sisi kama wanadamu hatuna uwezo wa kuelezea utendaji wa Mungu ulivyo wala hata kumwelezea zaidi na vile tu alivyoamua kutufunilia kumhusu yeye.

Biblia iko wazi kabisa kwamba sisi kama wanadamu tunafahamu kwa sehemu tu mambo ya Mungu na unabii.

Wakoritho 13:9 Kwa maana tunafahamu kwa sehemu; na tunafanya unabii kwa sehemu;

Haya mambo ya Mungu tunayafahamu kwa sehemu tu maana Roho mtakatifu pekee ndiye anayeamua kutufunulia mambo ya Mungu kwa namna anavyotaka yeye.

Haya mambo ya Mungu hakuna namna nyingine ya kuyafahamu kama siyo tu KUFUNULIWA na Roho wake; kwa maneno mengine hatufahamu mambo ya Mungu kwa kusoma theolojia, au kusoma sana biblia, au kuomba sana.

Tunayafahamu haya mambo pale tu Roho mtakatifu anapoamua kutufunulia.

1Wakoritho 2:9 “lakini, kama ilivyoandikwa, Mambo ambayo jicho halikuyaona wala sikio halikuyasikia, (Wala hayakuingia katika moyo wa mwanadamu,) Mambo ambayo Mungu aliwaandalia wampendao. Lakini Mungu ametufunulia sisi kwa Roho. Maana Roho huchunguza yote, hata mafumbo ya Mungu. Maana ni nani katika binadamu ayajuaye mambo ya binadamu ila roho ya binadamu iliyo ndani yake? Vivyo hivyo na mambo ya Mungu hakuna ayafahamuye ila Roho wa Mungu”

Nataka angalau kwa ufupi tuangalie hii siri ya ajabu kuhusu utatu mtakatifu wa Mungu wetu wa pekee mmoja na wa kweli.

        NAFSI YA BABA, NAFSI YA MWANA, NAFSI YA ROHO MTAKATIFU;

Kwanza kabisa maandiko yametuhakikishia sehemu nyingi tu kuhusu Utatu mtakatifu wa Mungu. Hebu tuangalie baadhi ya maandiko kuhusu utatu mtakatifu;

1Yohana 5:8 “Kwa maana wako watatu washuhudiao mbinguni, Baba, na Neno, na Roho Mtakatifu, na watatu hawa ni umoja”

Mathayo 28:19 “Basi, enendeni, mkawafanye mataifa yote kuwa wanafunzi, mkiwabatiza kwa jina la Baba, na Mwana, na Roho Mtakatifu;”

Mathayo 3:16-17 “Naye Yesu alipokwisha kubatizwa mara akapanda kutoka majini; na tazama, mbingu zikamfunukia, akamwona Roho wa Mungu akishuka kama hua, akija juu yake; na tazama, sauti kutoka mbinguni ikisema, Huyu ni Mwanangu, mpendwa wangu, ninayependezwa naye”

Hiyo ni baadhi ya mistari ambayo inaonesha kwa pamoja kuhusu uwepo wa nafsi tatu za Mungu, ukiangalia huo mstari wa mwisho hapo unaona hizi nafsi tatu kwa undani zaidi ten azote tatu zikiwa kwenye utendaji tofauti tofauti.

Ilisikika sauti kutoka mbinguni maana yake Mungu Baba, Yesu akiwa majini akiwa amebatizwa (maana yake nafsi ya pili Mungu mwana) na Roho wa Mungu akishuka kama huo (Maana yake nafsi ya tatu ya Mungu Mungu Roho mtakatifu)

Nitaifafanua zaidi mistari hiyo yote kadei somo linavyoendelea,

Iko hivi; nafsi ya Baba ni Mungu, nafsi ya mwana ni Mungu, na nafsi ya Roho mtakatifu ni Mungu, lakini hakuna miungu watatu.

Nafsi ya Baba siyo nafsi ya mwana wala nafsi ya Baba siyo nafsi ya Roho mtakatifu, wala nafsi ya mwana siyo ya Roho mtakatifu lakini nafsi zote ni MUNGU mmoja.

        AJABU KUU KUHUSU UTATU MTAKATIFU.

Wote wanashirikiana kufanya wanachotaka, Ukiangalia utashangaa namna ambavyo huu utatu mtakatifu wanavyoshirikiana kwa kila jambo.

Nataka nikuoneshe kazi zao kwa ufupi ikifuatiliwa na mifano halisi inayotuelezea haya majukumu yao yalivyo kaa;

1.    Mungu Baba ndiye mbeba nia au mbeba maono ya jambo tena anayetoa dira na ramani ya kazi wanayotaka kuifanya, na ndiyo maana anaitwa BABA huko mbeleni nitakuonesha vizuri maana ya Baba kwamba ni chanzo.

2.     Mungu Mwana ndiye mtendaji mkuu wa kazi ya Uungu, katika kila jambo wanalolifanya. Ndiyo maana anaitwa Neno na ndilo lenye sifa ya kuumba, tutaangalia pia vizuri kule mbele.

3.    Mungu Roho mtakatifu ni mmaliziaji wa kazi ya waliyoianza Baba na Mwana; ndiyo maana anaitwa msaidizi (Paraclitus) kwa sababu anakuja kama kusaidia kazi iliyoanishwa tayari na kuimalizia.

  Mfano wa kwanza (2).

   UUMBAJI WA MUNGU.

Wakati Mungu anaziumba mbingu na nchi, maandiko yanasema Roho wa Mungu alikuwa ametulia juu ya uso wa maji, ndipo Mungu akawa anatamka Neno na ikawa kama alivyotamka.

Kumbuka ukitaka kumwelewa Mungu wetu japo kwa mbali kwa ufahamu aliyotupa; hebu turudi kumwangalia mwanadamu kidogo ambaye ndiye kiumbe pekee aliyeumbwa kwa sura na mfano wa Mungu.

Mwanadamu anazo sehemu kuu tatu ili akamilike; yaani Roho, nafsi na mwili kama vile Mungu wetu alivyo na nafsi tatu Baba, Mwana na Roho mtakatifu.

Sasa kama ujuavyo mwili huwa unaongozwa kutenda kile nafsi inachokuwaza wakati huo; vivyo hivyo hapa najuaa ni ngumu kidogo kumwonesha Mungu wakati akiwaza kwenye uumbaji kwamba kitokee nini hadi unapoona kimeshaumbwa na nafsi ya pili tayari.

kwa hiyo, unaposikia Mungu akasema na iwe nuru ikawa, maana yake nafsi ya pili ambayo ndiyo mtekelezaji mkuu alikuwa akisikiliza nia ya ndani aliyonayo Baba na kuifanya itokee mara.

Nataka nikuoneshe kwamba nafsi ya pili Yesu ndiye muumbaji (mtekelezaji mkuu)

Wakilosai 1:15-17 “naye ni mfano wa Mungu asiyeonekana, mzaliwa wa kwanza wa viumbe vyote. Kwa kuwa katika yeye vitu vyote viliumbwa, vilivyo mbinguni na vilivyo juu ya nchi, vinavyoonekana na visivyoonekana; ikiwa ni vitu vya enzi, au usultani, au enzi, au mamlaka; vitu vyote viliumbwa kwa njia yake, na kwa ajili yake. Naye amekuwako kabla ya vitu vyote, na vitu vyote hushikana katika yeye”

Unaposikia kwamba Roho wa Mungu akatulia juu ya vilindi vya maji alikuwa akisubiri utekelezaji wa uumbaji ili amalizie kazi hiyo.

   Mfano wa pili (2).

      KAZI YA UKOMBOZI WA MWANADAMU.

Kimsingi nafsi ya Mungu Baba ndiyo ilitoa wazo la kuwakomboa wanadamu baada ya kuanguka dhambini na kutengwa mbali na uso wa Mungu.

Yohana 3:16 “Kwa maana jinsi hii Mungu aliupenda ulimwengu, hata akamtoa Mwanawe pekee, ili kila mtu amwaminiye asipotee, bali awe na uzima wa milele”

Kimsingi hapa anayeongelewa ni Mungu Baba japo wote walikubaliana katika hili kama tulivyoona kwamba wote wanakubaliana kwa jambo moja kwa sababu wao ni umoja.

Sasa angalia, Nafsi ya pili ya Mungu (Yesu)  aitwaye Neno ndiye aliyetumwa kuja kufanya kabisa kazi ya ukombozi na kufa msalabani, kumbuka ndiye mtekelezaji mkuu kwa kila kazi wafanyayo.

Yohana 1:1-3 “Hapo mwanzo kulikuwako Neno, naye Neno alikuwako kwa Mungu, naye Neno alikuwa Mungu. Huyo mwanzo alikuwako kwa Mungu. Vyote vilifanyika kwa huyo; wala pasipo yeye hakikufanyika cho chote kilichofanyika”

Tena angalia mstari wa 14 kwenye kitabu hicho hicho;

Yohana 1:14 “Naye Neno alifanyika mwili, akakaa kwetu; nasi tukauona utukufu wake, utukufu kama wa Mwana pekee atokaye kwa Baba; amejaa neema na kweli”

Kumbe mtekelezaji wa ukombozi wa mwanadamu ni naafsi ya pili ya Mungu kama tulivyoona tena kwenye uumbaji kwamba ndiye mtendaji mkuu (Chief engineer)

Sasa angalia nafasi ya Roho mtakatifua hapa;

Yohana 16:13 “Lakini yeye atakapokuja, huyo Roho wa kweli, atawaongoza awatie kwenye kweli yote; kwa maana hatanena kwa shauri lake mwenyewe, lakini yote atakayoyasikia atayanena, na mambo yajayo atawapasha habari yake”

Maana yake kumbe yeye ndiye anayetukamilisha au kwa maneno mengine ndiye anayekamilisha kazi ya ukombozi wa mwanadamu ambao ni kazi ya Mungu mwenyewe katika nafsi zote tatu.

lakini Roho mtakatifu kazi yake sasa ni kukamilisha wale waliyoupokea wokovu ili wakamilike sana mbele za Mungu wawe wasiyo na lawama wala kunyanzi. Na ndiye aliyeachiwa kanisa kwa sasa kulisimamia hadi unyakuo utakapotokea.

Kumbuka Mwanadamu ameumbwa katika sehemu tatu, mwili nafsi na roho na zote hizo zinautofauti wake na mfanano wake lakini zote tatu kwa pamoja zinaitwa mwanadamu. Uwezi kusema nafsi yako siyo wewe lakini kimsingi nafsi na roho ni vitu viwili tofauti vyenye utendaji kazi tofauti, hali kadhalika na mwili.

Vivyo hivyo na Mungu naye anazo nafsi tatu lakini huwezi kusema ni miungu watatu,

Moja kati ya tabia tuliyoiona kuhusu utatu mtakatifu ni kwamba;

Wote wanapatana kwa jambo moja (wana nia moja)

1Yohana 5:8 “Kwa maana wako watatu washuhudiao mbinguni, Baba, na Neno, na Roho Mtakatifu, na watatu hawa ni umoja”

Yesu hawezi kufanya lolote bila kusikia kutoka kwa Baba na wala Roho mtakatifu haneni kwa shauri lake mwenyewe hadi asikie kutoka kwa Yesu.

Yohana 12:49 Kwa sababu mimi sikunena kwa nafsi yangu tu; bali Baba aliyenipeleka, yeye mwenyewe ameniagiza nitakayonena na nitakayosema.

Yohana 16:13-15 Lakini yeye atakapokuja, huyo Roho wa kweli, atawaongoza awatie kwenye kweli yote; kwa maana hatanena kwa shauri lake mwenyewe, lakini yote atakayoyasikia atayanena, na mambo yajayo atawapasha habari yake. Yeye atanitukuza mimi, kwa kuwa atatwaa katika yaliyo yangu na kuwapasha habari. Na yote aliyo nayo Baba ni yangu; kwa hiyo nalisema ya kwamba atatwaa katika yaliyo yangu, na kuwapasheni habari.

1Yohana 5:8 Kwa maana wako watatu washuhudiao mbinguni, Baba, na Neno, na Roho Mtakatifu, na watatu hawa ni umoja. Kila mmoja anamshuhudia mwenzake.

  Baba anamshuhudia mwana

Mathayo 3:17 na tazama, sauti kutoka mbinguni ikisema, Huyu ni Mwanangu, mpendwa wangu, ninayependezwa naye.

  Mwana anamsuhudia Roho mtakatifu.

Yoh 16:13 Lakini yeye atakapokuja, huyo Roho wa kweli, atawaongoza awatie kwenye kweli yote; kwa maana hatanena kwa shauri lake mwenyewe, lakini yote atakayoyasikia atayanena, na mambo yajayo atawapasha habari yake.

  Roho anamshuhudia Mwana

 Yoh 15:26 Lakini ajapo huyo Msaidizi, nitakayewapelekea kutoka kwa Baba, huyo Roho wa kweli atokaye kwa Baba, yeye atanishuhudia.

Kuna mengine kadri siku zinavyoenda kama nikipata kibali kuhusu utatu mtakatifu nitayaeleza lakini nataka kwanza tupige hatua kidogo leo.

Mungu wetu ambaye ni mmjoa na wa pekee wa kweli aliye na nafsi tatu (Baba, Mwana na Roho mtakatifu) anazo tabia nne za kipekee zinazomtofautisha na miungu mingine yote ambayo ulishawahi kuisikia na ambayo hukuwahi kuisikia lakini ipo. Nataka tuziangalie kwa ufupi hapa;

TABIA KUU NNE ZA KIPEKEE ALIZONAZO MUNGU WETU MUUMBA WA MBINGU NA NCHI TOFAUTI NA MIUNGU WENGINE.

1.     ANAPATIKANA MAHALI POPOTE MUDA WOWOTE.

Ni Mungu wetu pekee ndiye anayeitwa OMNIPRESENCE likiwa ni maneno mawili ya kilatini yakimaanisha anayepatikana mahali popote muda wowote.

Yeye kwa sababu ni Mungu aliyeziumba mbingu na nchi hakuna chochote kinachoweza kujificha na uso wake tena popote ulipouumbaji wake naye anapatikana hapo.

Hakuna mungu mwingine aliyena sifa hizo hata Lusifa (shetani) akiwa sehemu moja hawezi akapatikana tena sehemu nyingine lakini anachofanya anatengeneza mtandao wake na wakati mwingine wanapomuita wanafikiri ni yeye kumbe ameweka jini lenye sura yake.

Lakini Mungu wetu yupo kila mahali na tena yupo na kila mtu zaidi hata ya pumzi aliyonayo mtu.

Zaburi 139:7-12  Niende wapi nijiepushe na roho yako? Niende wapi niukimbie uso wako? Kama ningepanda mbinguni, Wewe uko; Ningefanya kuzimu kitanda changu, Wewe uko. Ningezitwaa mbawa za asubuhi, Na kukaa pande za mwisho za bahari; Huko nako mkono wako utaniongoza, Na mkono wako wa kuume utanishika. Kama nikisema, Hakika giza litanifunika, Na nuru inizungukayo ingekuwa usiku; Giza nalo halikufichi kitu, Bali usiku huangaza kama mchana; Giza na mwanga kwako ni sawasawa.

        2. NDIYE MUNGU PEKEE MWENYE NGUVU ZOTE.

Jina rasmi kwa kilatini anaitwa OMNIPOTENT likiwa ni muunganilo wa maneno mawili OWN na POTENT likiwa na maana ya MWENYE NGUVU ZOTE.

Ni Mungu wetu pekee ndiye anayeitwa mwenyenzi kwa sababu ni yeye pekee Mungu aliye na nguvu zote na ambaye nguvu zake hazina mipaka wala kikomo kwake hakuna kushindwa wala hajawahi kushindwa hata siku moja.

YEREMIA 32:27 Tazama, mimi ni Bwana, Mungu wa wote wenye mwili; je! Kuna neno gumu lo lote nisiloliweza?

       3 NDIYE MUNGU PEKEE ANAYEJUA YOTE.

Jina lingine linalotumika ni OMNISCIENCE likiwa na maana ya ajuaye yote.

Mungu wetu muunba wa mbingu na nchi ndiye Mungu pekee anayejua yote na ufahamu wake hauna kikomo na wala haushindwi kitu. Hakuna utakachomficha asijue na hakuna kitu kipya kinachoweza kuvumbuliwa mahali popote asikijue. Hii nayo ni sifa pekee aliyonayo Mungu wetu. Miungu mingine yote ina ukomo kwenye kujua wanayoyajua.

ZABURI 139:1-6 ” Ee Bwana, umenichunguza na kunijua. Wewe wajua kuketi kwangu na kuondoka kwangu; Umelifahamu wazo langu tokea mbali. Umepepeta kwenda kwangu na kulala kwangu, Umeelewa na njia zangu zote. Maana hamna neno ulimini mwangu Usilolijua kabisa, Bwana. Umenizingira nyuma na mbele, Ukaniwekea mkono wako. Maarifa hayo ni ya ajabu, yanishinda mimi, Hayadirikiki, siwezi kuyafikia”

    4. NDIYE MUNGU PEKEE MWENYE HEKIMA ZOTE.

Hekima ya Mungu wetu ndiyo hekima ya pekee inayoshinda hekima zote za wanadamu na za miungu mingine. Hata inafikia mahali biblia inashindwa kuielezea hii hekima ya Mungu jinsi ilivyo kuu, ikasema;

1Wakor 1:25 Kwa sababu upumbavu wa Mungu una hekima zaidi ya wanadamu, na udhaifu wa Mungu una nguvu zaidi ya wanadamu.

Zaburi 104:24 Ee Bwana, jinsi yalivyo mengi matendo yako! Kwa hekima umevifanya vyote pia. Dunia imejaa mali zako.

Furaha nzuri sana maishani ni kuishi maisha matakatifu yenye kumpendeza Mungu, na njia rahisi ya kuweza kuishi maisha matakatifu ni kumpatia Yesu maisha yako, yaani kuokoka. Unapo okoka Yesu anakuwa anayatazama maisha yako kwa ushindi ulio mkuu, huku akikutakasa kwa ajili ya uzima wa milele.

Kama bado hauja okoka sali sala hii fupi kwa imani, na utakuwa umekoka na kumpokea Roho Mtakatifu huku ukitembea kwa kuishi maisha matakatifu;-

Sema "Eeh Bwana Yesu, ninakuja mbele yeko, mimi ni mwenye dhambi, nimekutenda dhambi kupitia matendo yangu,  kusema kwangu, kuwaza kwangu na kwa dhambi za kujua na za kutokujua, Eeh Bwana Yesu ninaomba unisamehe, nisafishe kwa Damu yako ya thamani, nifute jina langu kwenye kitabu cha hukumu na uniandike jina langu kwenye kitabua cha Uzima wa milele, Eeh Bwana Yesu nakuja mbele zako kuanzia siku ya leo nifinyange moyo wangu, nafsi yangu na roho yangu kama upendavyo wewe, maisha yangu yote nakukabidhi wewe uyaongoze kwa Roho wako Mtakatifu, naomba na kuamini kupitia Jina la Yesu kristo aliye Bwana na mwokozi wa maisha yangu. Amina. 

Mpendwa kama umesali sala hii fupi kwa kumaanisha tayari umeupokea wokovu, unatakiwa utafute kanisa lililo karibu yako lenye kumuabudu Mungu wa kweli na uungane nao kwa ajili ya kukua kiroho. 

Kama umeguswa chochote kupitia makala hii , naomba uandika ujumbe wako hapo chini na nitakapo soma nitafurahia sana.

Na kama utahitaji maombi na ushauri wowote wa kiroho, wasiliana nami kupitia namba na emeil yangu kwa njia ya sms. mwishoni nitatoa namba na email,  lakini kama umeokoka kupitia makala hii waweza kunitumia ujumbe kwa njia ya simu , kwa watsapp, au kwa kawaida , au kupitia email yangu nitakayo itoa hapo chini.

Somo hili limeandaliwa na  Noel Pallangyo,  na kuandikwa na mwandishi Daniel J Mbugu wa makala ya AMKA UKUE KIRIHO.

Karibu katika sehemu ya Tatu ambayo itawekwa kupitia blogu hii. Mungu akubariki sana.

                     Wako mpendwa katika Kristo, 

                           Daniel Mbugu.

Kwa mwendelezo wa mafundisho zaidi ya neno la Mungu tembelea  AMKA UKUE KIRIHO. www.amkaukuekiroho1.blogspot. Na kwa ushauri kuhusiana na maisha ya wokovu tuma ujumbe katika email yangu. www.mbugudaniel@gmail.com. Au wasiliana nami kwa kutuma ujumbe kwa njia ya sms au whatsApp kwa 0758505174/ 0655505173.